🐳
（Ok，零晨兩點，係可以開始打千字文嘅時候喇。）
每年暑假都想促成一啲事件、活動發生，做到自己死下死下，先覺得似一個暑假，由扭扭擰擰到毒檸王國，由一個人變兩個人，兩個人變四個人，再唔知點解，一變就變咗四十幾五十人，過程竟然好似漫畫銀魂一樣，角色逐個推出，由一開始嘅路人，慢慢喺心入面越來越多戲份，唉，麻煩麻煩。人一生都係不停同人建立孽緣累積債項，搞到今時今日咁嘅田地，老實講，都真係好開心～
一如活動一開始所講，其實真係冇乜嘢比到大家㗎，一開始只係想開始一個遊戲，目標係攻打大魔王，短時間內盡快闖關，大家想加入就加入啦，你想做法師就做法師，要畫魔法陣嘅就畫魔法陣，仲有啲武器商人呀～精靈呀～獸人，總之你諗到有咩力量想使出即管使出嚟，我地睇下點樣chok招聯合攻擊，打唔打得贏大魔王都好，什至連招式畫面係咪華麗，我都無乜所謂，反正遊戲係自己設計，難度都可以隨便降低，只係務求大家係冒險旅程之中都玩得開心，咁呢個遊戲就已經充分發揮到佢嘅作用。
誰不知⋯⋯誰不知你哋哩一班人呢，我本來係諗住《咕嚕咕嚕魔法陣》，點知你哋竟然《哈利波特》，零budget，又要玩咁大製作，搏埋條命好未呀？吖⋯⋯你哋真係搏命㗎喎，途中八號風球都打兩個～你哋竟然當佢係掌風⋯⋯ok，既然你哋係咁樣嘅態度，我都唔需要再同你地客氣，話說人同人之間相處都係一種力學，你比幾大力chur盡佢，我又要俾返Double嘅力，唉～惡性循環！冤冤相報何時了，睇嚟呢種咁拉扯嘅關係，短期內都冇辦法完。
好多謝你哋出現咗喺呢個活動入面，雖然暫時只係開始咗一次試演會，而我亦唔明點解尋晚大家會喺度喊苦喊忽，都未走啱啱先開始咋嘛，明明咁開心，你諗下，真係好幸福㗎喎，唉～是但你地。本人未有咩眼淚，但係我係好愛你地每一位，睇住你地開心，我就開心。孽緣又好，長命債又好，好多謝你地每一個出現咗喺我地生命入面，尋晚我同oscar喺你地走咗之後，我哋其實都講唔到啲咩，只係一種好滿足嘅感覺，同時亦好明白係彼此心入面到底係咩感覺。
回憶番嗰個所謂慶功，我地坐埋一邊，見到大家分咗幾個組坐，每組都笑得咁開心，係我哩一年入面見到最珍貴嘅畫面，哩個畫面我會save底喺腦入面重播好多次。各位，辛苦晒，good唔good show都好，多謝陪同一齊行過哩段時間，有好多嘢我地經驗不足，安排不周，多謝你地有時嘅體諒，同有時嘅唔客氣，好似屋企人嘅感覺，我會好珍惜我地由陌生人變到宜家嘅複雜嘅關係，愛你地每一位，big hug（錫額頭）。
Ningning
Search